Lajmet e fundit

Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, i kryesuar nga Albulena Haxhiu, kryetare, priti në takim Sindikatën e Judikaturës së Republikës së Kosovës, e përfaqësuar nga nëntë anëtarë.

Në këtë takim u diskutua lidhur me kërkesat e Sindikatës, për të cilat po mbahet grevë nga data 4 korrik 2018.

Kryetar i Sindikatës së Punëtorëve të Judikaturës, Asllan Rusinovci, paraqiti para Komisionit kërkesat e grevistëve, të cilat ishin: rritja e pagave, amendamentimi i ligjeve, statusi i punonjësve në gjykata dhe prokurori, si dhe kërkesa për pagesën e përvojës së punës.

Ndërsa, Sadri Llumnica, përfaqësues sindikal i prokurorive të Kosovës, kërkoi nga komisioni që të përdor autoritetin për të ndikuar në përmbushjen e kërkesave të grevistëve.

Mbledhja vazhdoi me diskutimet e anëtarëve të komisionit dhe të sindikatës, për kërkesat e parashtruara nga kjo sindikatë.

Komisioni përkrahu kërkesat e sindikatës dhe u angazhua për të adresuar ato në institucionet gjegjëse.