Lajmet e fundit

Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë kundër Korrupsionit, kryesuar nga Albulena Haxhiu, mbajti sot mbledhjen e vet të rregullt.

Nga pika e shqyrtimit të Raportit Vjetor të punës së Komisionit Qendror të Zgjedhjeve për vitin 2017, u tha se ky raport vetëm është diskutuar dhe janë dhënë vërejtje, mirëpo nuk është miratuar ende në KQZ, për shkak se anëtarët e këtij institucioni aktualisht janë pa mandat.

Këtë e bëri të ditur, kryetarja e këtij komisioni, Valdete Daka, e cila prezantoi raportin, dhe kryeshefi ekzekutiv i Sekretariatit të KQZ-së, Enis Halimi.

Komisioni vlerësoi se raporti i punës i KQZ-së, përderisa nuk është i miratuar nga institucioni përkatës, nuk mund të miratohet as nga komisioni.

Në vazhdim, komisioni nuk u përkrahu Projektligjin për aktet juridike, për shkak se, siç u tha, ky projektligj nuk i plotëson kushtet për t'u futur në procedurë parlamentare të shqyrtimit. Rrjedhimisht, projektligji u rekomandua për mosvotim në seancë.

Gjatë kësaj mbledhjeje, u formua grupi punues për Projektligjin për Këshillin Gjyqësor të Kosovës, grupi punues për Projektligjin për Këshillin Prokurorial të Kosovës dhe si për Projektligjin për përgjegjësitë disiplinore të gjyqtarëve dhe prokurorëve.