Lajmet e fundit

Kryetarja e Komisionit për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, Albulena Haxhiu, po qëndron në një vizitë zyrtare në Seoul të Koresë së Jugut.

Në këto takime, ajo së bashku me drejtorin e Agjensionit Kundër Korrupsionit, zhvilluan takime me Komisionin Antikorrupsion të Koresë së Jugut, me qëllim të implementimit të modelit korean në vlerësimin e rreziqeve të korrupsionit në projektligje dhe akte të tjera.
Në këto takime, po ashtu u diskutua edhe për Ligjin e Agjensionit Kundër Korrupsionit, si dhe atë për deklarimin dhe prejardhjen e pasurisë.

Është diskutuar, po ashtu, edhe për bashkëpunimin në të ardhmen dhe projektet që do të implementohen, me qëllim të parandalimit dhe luftimit sa më efikas të korrupsionit.

Kjo vizitë është realizuar me mbështetjen e UNDP-së, zyra në Kosovë, në kuadër të Projektit SAEK II dhe UNDP zyra në Seoul.