Lajmet e fundit

Kryetarja e Komisionit Parlamentar për Zhvillim Ekonomik, Infrastrukturë, Tregti, Industri dhe Zhvillim Rajonal Sala Berisha-Shala, vizitoi sot Autoritetin e Aviacionit Civil, në kuadër të aktiviteteve të rregullta të mbikëqyrjes së agjencive të pavarura që i raportojnë këtij Komisioni. Kryetarja u prit nga z. Samet Dalipi, kryesues i Bordit Mbikëqyrës të AAC-së dhe menaxhmenti i AAC-së, i kryesuar nga drejtori i përgjithshëm, z. Dritan Gjonbalaj, si dhe zëvendësdrejtori i përgjithshëm, z. Xhelil Bekteshi.

Kryesuesi i Bordit Mbikëqyrës dhe Drejtori i përgjithshëm i AAC-së, e informuan kryetaren për aktivitetet e AAC-së, të arriturat në aspektin e zbatimit të legjislacionit të BE-së, për sfidat me të cilat ballafaqohet AAC-ja, si dhe për veprimet e ndërmarra me qëllim të zbatimit të rekomandimeve të Komisionit për Raportin vjetor të AAC-së për vitin 2015.

Kryetarja e Komisionit, z. Sala Berisha-Shala, përgëzoi AAC-në për punën e mirë dhe rikonfirmoi gatishmërinë e Komisionit për mbështetje të vazhdueshme, përderisa AAC-ja vazhdon të punojë në përputhje me ligjet në fuqi. Ajo shtoi se AAC-ja është një agjenci shembull që vullneti i mirë për punë tejkalon barrierat për të realizuar synimet strategjike.

Për shkak të disa raportimeve në media kohën e fundit lidhur me sigurinë dhe sigurimin e operimeve në aviacionin civil, z. Gjonbalaj përfitoi nga rasti që t'ia rikonfirmojë kryetares se, në asnjë moment operimet e aviacionit civil në ANP "Adem Jashari" dhe në Agjencinë për Shërbime të Navigacionit Ajror, nuk kanë qenë të rrezikuara dhe se autoritetet publike me përgjegjësi në mbikëqyrjen e aviacionit civil po e kryejnë punën e tyre me përgjegjësi e kompetencë të plotë. Gjithashtu, ai dha një raport të shkurtër rreth procesit për normalizimin e plotë të hapësirës së ulët ajrore të Kosovës, të udhëhequr nga NATO-ja që do të intensifikohet gjatë vitit 2018 me synimin që korridore të reja ajrore midis Kosovës dhe Shqipërisë, Malit të Zi e Serbisë të hapen në fillim të vitit 2019, gjë që do të shkurtonte kohën e fluturimit për në Prishtinë për 20 minuta.

Gjatë takimit u përmenden edhe sfidat e AAC-së, siç janë: përcaktimi i një objekti qeveritar për vendosjen e AAC-së ose ndërtimi i objektit me të hyrat vetanake, pamundësia për të rekrutuar stafin e paraparë sipas Rregullores së brendshme të AAC-së etj. Kryetarja Berisha-Shala, shprehu gatishmërinë për të adresuar sfidat e ngritura nga AAC-ja.