Lajmet e fundit

Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi, i kryesuar nga Ismajl Kurteshi, kryetar, ka mbajtur mbledhjen e radhës, në të cilën u shqyrtua Projektligji për Ratifikimin e Marrëveshjes për pjesëmarrjen e Kosovës në programin Evropa Kreative për Mbështetjen e Sektorëve Kulturorë dhe Kreativ.

Në këtë mbledhje i pranishëm ishte edhe ministri i Kulturës, Rinisë dhe Sportit, Kujtim Gashi, i cili para anëtarëve të komisionit prezantoi rëndësinë e marrëveshjes në fjalë, përmes të cilës, siç tha ai, do të përfitojnë të rinjtë tanë.

Ministri Gashi kërkoi nga anëtarët e komisionit përkrahjen e tyre për miratim.
Pas diskutimeve, Komisioni përkrahu njëzëri Ratifikimin e Marrëveshjes për pjesëmarrjen e Kosovës në programin Evropa Kreative për Mbështetjen e Sektorëve Kulturorë dhe Kreativ, duke i rekomanduar Kuvendit miratim e tij.