Lajmet e fundit

Sot, Komisioni për Integrime Evropiane dhe Komisioni për Punë të Jashtme, kanë pritur në takim një delegacion të Grupit të Miqësisë për marrëdhënie me shtetet e Evropës jug-lindore të Bundestagut gjerman.

Zëvendëskryetari i Komisionit për Integrime Evropiane, Armend Zemaj, pasi i uroi mirëseardhje delegacionit gjerman, prezantoi punën e Komisionit për Integrime Evropiane në raport me sfidat dhe të arriturat e Kosovës në fushën e integrimeve evropiane. Ndër tjerash, ai theksoi se për të shënuar progres në këtë drejtim është më se i nevojshëm bashkëpunimi ndërmjet Bundestagut gjerman dhe Kuvendit të Republikës së Kosovës.

"Ne si shtet synojmë familjen evropiane", theksoi Zemaj.

Në emër të Komisionit për Punë të Jashtme, fjalën e mori Elmi Reçica, i cili theksoi se Kosova duhet të jetë pjesë e sigurisë globale, duke parandaluar dukuritë negative dhe duke siguruar mbështetje të vazhdueshme nga shteti i Gjermanisë.

Po ashtu, Reçica foli edhe për procesin e përmbylljes së dialogut në mes të Kosovës dhe Serbisë, duke thënë se vendi ynë është i interesuar për stabilizimin e marrëdhënieve midis dy shteteve.

"Ne jemi të orientuar drejt perëndimit, jemi pro Brukselit dhe pro anëtarësimit në NATO", theksoi Reçica.

Fjalën gjithashtu e morën edhe anëtarët e tjerë të komisioneve, të cilët paraqitën qëndrimet e tyre sa i përket integrimeve evropiane dhe punëve të jashtme.

Në anën tjetër përfaqësuesi i Grupit të Miqësisë për marrëdhënie me shtetet e Evropës jug-lindore të Bundestagut Gjerman, Josip Juratovic, tha se misioni i tyre është që të promovojnë dhe të forcojnë ndërgjegjen parlamentare, duke u thirrur në arritjen e kompromisit midis shteteve.

"Kompromisi është zgjedhja e vetme për të arritur tutje", theksoi Juratovic.

Ai gjithashtu shprehu gatishmërinë për vazhdimin e bashkëpunimit midis Kuvendit të Kosovës dhe Bundestagut gjerman.