Lajmet e fundit

"Lufta kundër terrorizimit dhe radikalizmit në rajon", ishte tema e sotme e ditës se dytë të punimeve të Samitit të komisioneve për punë të jashtme të parlamenteve të shteteve të Evropës, të organizuar nga Komisioni për Punë të Jashtme të Kuvendit të Republikës së Kosovës.

Paneli i katërt dhe i fundit i këtij samiti, u kryesua nga znj. Anne Brasseur, anëtare e parlamentit të Luksemburgut, kryesuese e delegacionit në asamblenë parlamentare të Këshillit të Evropës.

Zëvendësministri i Punëve të Jashtme të Republikës së Kosovës, Valon Murtezaj, gjatë diskutimit të tij fillimisht foli për përkushtimin që ka qeveria e Kosovës në rrugën drejt integrimeve evropiane, ndërkaq ka folur edhe për rëndësinë e fqinjësisë së mirë në rajon. Tutje, pasi ka përmendur dialogun e Kosovës me Serbinë, tha se qeveria serbe duhet të zbatojë marrëveshjet që janë arritur gjatë këtyre bisedimeve. Ai vlerësoi se liberalizimi duhet të ndodhë shumë shpejt, ndërkaq, vlerësoi se në rast se nuk ndodh, ky është dështim i të gjithëve.

Në vijim, duke u ndërlidhur me temën e sotme të këtij samiti për luftën kundër terrorizimit dhe radikalizmit në Kosovë, ai tha se në rast se nuk mungon bashkëpunimi, mund të luftohet bashkërisht ky fenomen.

Ndërkaq, ka sqaruar mes tjerash edhe angazhimet e mëtejme dhe gatishmërinë që ka qeveria për luftimin e kësaj dukurie. Me këtë rast, ai ka përmendur edhe faktin se viteve të fundit nuk ka asnjë pjesëtarë të Kosovës të përfshirë në luftëra të huaja.

Zëvendëskryeministri i Kosovës, Hajredin Kuçi, me këtë rast tha se, bashkëpunimi për luftimin e këtyre dukurive është i domosdoshëm, ndërkaq ka përmendur edhe faktin se ka mungesë të bashkëpunimit me organizata ndërkombëtare. Kjo, sipas tij, po krijon hendek. Ai pasi ka sqaruar ligjet të cilat janë nxjerrë për këtë çështje, tha se njëra nga mënyrat parandaluese të këtyre dukurive është bashkëpunimi me shkollat dhe me bashkësitë fetare.

"Jemi të gatshëm të kryejmë detyrat tona, por kërkojmë edhe ndihmën tuaj", tha me këtë rast, Kuçi.

Jan Braathu, ambasador i misionit të OSBE-së në Kosovë, fillimisht shpalosi aktivitetet e këtij misioni dhe iniciativën që kanë pasur drejt mbështetjes së Kosovës në këtë çështje. Ai tha se OSBE do të vazhdojë të ndihmojë qeverinë në zbatimin e strategjisë për luftimin e terrorizmit dhe radikalizmit. Duke shtuar se jo vetëm fuqizimi i ligjeve mund ta rrënjosë këtë dukuri, por, vijoi ai, për këtë nevojitet kontributi i të gjithëve, me theks të veçantë përmendi edhe shoqërinë civile. Ndërsa, tha se bashkëpunimi me bashkësitë fetare është i domosdoshëm. Braathu tha se ekstremizmi buron nga gjuha e urrejtjes, duke përmendur me këtë rast grafitet që nxisin urrejtje, duke marrë shembull një të tillë që ka ndodhur në Gjilan.

"Luftimi i terrorizimit dhe radikalizmit është një fenomen ndërkombëtar dhe që të jemi të suksesshëm duhet të bashkëpunojmë", tha Braathu.

Ndërkaq, Rihards Kols, zëvendëskryetar i Komisionit për Punë të Jashtme, Parlamenti i Letonisë, tha se kjo është çështje ndërkombëtare dhe një sfidë për tërë komunitetin. Sipas tij, kohëve të fundit terrorizmi e ka mbuluar Evropën, ndërkaq ka shtuar se kjo çështje duhet të trajtohet në mënyrë gjithëpërfshirëse dhe se duhet mobilizuar në nivel global.

Ai vijoi duke thënë se duhet t'i edukojmë të rinjtë tanë që idetë ekstremiste nuk janë të pranueshme, ndërkaq diskutimi i tij është fokusuar kryesisht në luftimin e propagandës në këtë drejtim.

Daut Haradinaj, kryetar i Komisionit për Punë të Brendshme, Siguri dhe mbikëqyrjen e FSK-së, gjatë diskutimit të tij shfaqi nevojën urgjente që Kosova duhet të jetë pjesë e INTERPOL-it, duke përmendur me këtë rast shkëmbimin e informatave që mund të kishte edhe në aspektin e luftës kundër terrorizimit dhe radikalizmit. Pasi ka përmendur mekanizmat që ka ndërmarrë shteti drejt luftimit të kësaj dukurie si dhe bazën ligjore që është krijuar për këtë çështje tha se institucionet e zbatimit të ligjit janë shumë të vendosura që të sjellin para drejtësisë të gjithë ata që nxisin ose që janë pjesëmarrës direkt në terrorizëm.

Pasi ka paraqitur statistikat e pjesëtarëve të Kosovës, pjesëmarrës në luftëra të huaja dhe për të arrestuarit, tha se shqetësuese në vend mbetet mungesa e perspektivës së të rinjve, si dhe mungesa e lëvizjes së lirë të qytetarëve në Evropë. "Rruga e vetme është Evropa dhe anëtarësimi në institucionet euroatlantike", tha Haradinaj.

Miro Kovaq, kryetar i Komisionit për Punë të Jashtme, Parlamenti i Kroacisë, tha se lufta kundër terrorizimit dhe radikalizmit është punë e institucioneve të vendit dhe se është detyrë e tyre që t'i luftojë këto fenomene. Ai tha se kjo duhet bërë në mënyrë efikase dhe se duhet vazhduar këtë betejë, ndërkaq ka përmendur edhe liberalizimin e vizave për Kosovën. "Besoj në fuqinë e popullit tuaj. Kroacia do t'iu ndihmojë sa herë që është e nevojshme", tha mes tjerash Kovaq.

Gjatë kryesimit të këtij samiti znj. Anne Brasseur tha mes tjerash se duhet të respektohet sundimi i ligjit, sepse kjo dëmton demokracinë e vendit dhe se duhet të ndërtohen institucione të fuqishme. "Sfidë për vendin tuaj është sundimi i ligjit", tha Brasseur.

Znj. Alessandra Roccasalvo, zëvendës përfaqësuese rezidente e UNDP-së në Kosovë, gjatë fjalës së saj lidhur me këtë çështje, ka përmendur publikimin e raportit të para dy vjetësh lidhur me radikalizmin, për hulumtimet dhe të dhënat e këtij raport. Ajo tha se janë të përqendruar që ta ndihmojnë qeverinë që të ndërmarrë masa parandaluese dhe se janë duke bashkëpunuar ngushte në këtë drejtim. Ajo ftoi të gjithë që mos ta lënë vetëm Kosovën.

Ndërkaq, deputetja Flora Brovina, tha se terrorizmi është kancer i shoqërisë kudo në botë dhe se tashmë çdo vend po ballafaqohet me këtë problem. Sipas saj kjo luftë kundër terrorizimit e radikalizmit nuk është e lehtë dhe se kërkon bashkëpunim ndërkombëtar dhe se kjo duhet luftuar në mënyrë globale.

Në vijim kanë diskutuar edhe z. Karel Schwarzenberg, kryetar i Komisionit për Punë të Jashtme, Dhoma e deputetëve, Republika Çeke, nënkryetari i Kuvendit, Xhavit Haliti, si dhe pjesëmarrës tjerë në këtë samit, përfaqësues të Parlamentit Evropian dhe të parlamenteve të shteteve të ndryshme evropiane, për të dhënë sugjerime të ndryshme lidhur me draft deklaratën.

Pas një konkluzioni se zgjidhjet në këtë drejtim duhet të jenë globale dhe të bashkëpunohet, përfaqësues të Parlamentit Evropian dhe të parlamenteve të shteteve të ndryshme evropiane, drejtues të institucioneve ndërkombëtare në Kosovë dhe institucioneve vendore, pjesëmarrës në këtë samit, kanë përkrahur një draft deklaratë. Deklarata e përbashkët është nënshkruar nga këta pjesëmarrës, ndërkaq, samiti ka përmbyllur punimet dy ditore në Kosovë.

SAMITI I KOMISIONEVE PARLAMENTARE PËR PUNË TË JASHTME

Prishtinë, Republika e Kosovës
19 - 22 shkurt 2017

DEKLARATË E PËRBASHKËT

Kryetarët dhe anëtarët e Komisioneve Parlamentare për Punë të Jashtme të: Shqipërisë, Belgjikës, Kroacisë, Republikës Ceke, Estonisë, Maltës, Holandës, Irlandës, Italisë, Letonisë, Lituanisë, Luksemburgut, Malit të Zi, Turqisë, Zvicrës, Mbretërisë së Bashkuar dhe Parlamentit Evropian u takuan në samitin e Komisioneve Parlamentare për Punë të Jashtme në Prishtinë, i cili mbajt më 19-21 shkurt 2017, dhe diskutuan për Procesin e integrimit në BE të vendeve të mbetura të Evropës Juglindore, Bashkëpunimin Rajonal të vendeve të Ballkanit Perëndimorë, Krizën e Imigrimit/Refugjatëve dhe Luftën kundër Terrorizmit dhe Radikalizmit në rajon dhe u pajtuan si më poshtë:
Pjesëmarrësit:

- Përsëritën rëndësinë që ka një perspektivë e qartë e integrimit në BE për të gjitha vendet e Ballkanit Perëndimorë si një garanci për paqe, prosperitet, stabilitet dhe siguri në këtë pjesë të Evropës.

- Mbështetën reformat që janë ndërmarrë në vendet e Ballkanit Perëndimorë në kërkim të integrimit të plotë në BE, si një instrument, që do të krijoj mundësi për ta përmirësuar jetën e qytetarëve të tyre.

- Kërkuan angazhim më të madh të BE-së në Ballkanin Perëndimor për të shmangur rreziqet e mundshme që mund të ndodhin nga ndikimi i akterëve të tjerë, si dhe nga ekstremizmi dhe radikalizmi i dhunshëm, që do të kishin ndikim të drejtpërdrejtë negativ në paqe, prosperitet, stabilitet dhe siguri në rajon dhe në vetë BE-në.

- Kërkuan që procesi i liberalizimit të vizave për qytetarët e Kosovës, të cilët mbeten të privuar nga liria e lëvizjes në zonën Shengen, të përfundoj me sukses.

- Përsëritën rëndësinë e madhe të një bashkëpunimi rajonal gjithëpërfshirës dhe konstruktiv në Ballkanin Perëndimor duke i përdorur më mirë disa iniciativa rajonale, përfshirë edhe Procesin e Berlinit, në arritjen e qëllimit për integrime Euro-Atlantike.

- Përsëritën që Kosova ka nevojë për mbështetje, që të bëhet anëtare e organizatave ndërkombëtare siç është INTERPOL-i, si garanci për përforcimin e sigurisë përmes shkëmbimit të inteligjencës dhe informacionit përkatës në ballafaqimin e sfidave dhe kërcënimeve të pazakonta, hibride dhe atyre transnacionale në rajon dhe në tërë Evropën.

- U dakorduan që Diplomacia Parlamentare duhet ta luaj rolin e saj në avancimin e Bashkëpunimit Konstruktiv Rajonal, në mënyrë që rajoni të jetë në gjendje të përfitoj nga anëtarësimi në organizatat rajonale dhe globale, si dhe të luaj një rol të rëndësishëm në këto organizata.

- Theksuan rëndësinë e gjetjes së zgjidhjeve të qëndrueshme në lidhje me krizën e refugjatëve në përputhje me standardet evropiane dhe ato ndërkombëtare të drejtave të njeriut dhe të solidaritetit si kundërpërgigje ndaj qëndrimeve ksenofobe dhe raciste. Vendet e Ballkanit Perëndimor duhet të shihen si pjesë përbërëse e gjetjes së zgjidhjeve të qëndrueshme për krizën e refugjatëve, për më tepë bashkëpunimi dhe koordinimi në mes të të gjitha shteteve është thelbësor për ta trajtuar krizën e tillë.

- Përmendën shembujt e mirë të integrimit të refugjatëve në shoqëri, dhe bënë thirrje për angazhim nga shtetet pritëse, në një proces të tillë.

- Shprehën angazhimin në luftën kundër terrorizmit dhe radikalizmit në rajon, në bashkëpunim me NATO-n dhe akterët e tjerë Euro-Atlantik.

- Përsëritën rëndësinë e madhe të bashkëpunimit rajonal në shkëmbimin e informacionit dhe përvojës, që shërben për të luftuar, në mënyrë më efikase, kundër terrorizmit dhe radikalizmit, në koordinim me shtetet anëtare dhe institucionet e BE-së si dhe akterët e tjerë të rëndësishëm euroatlantik.

- Theksuan rëndësinë e një sistemi arsimor të konsoliduar, të një game të gjerë të masave parandaluese dhe programeve, të rolittë shoqërisë civile në parandalim dhe riintegrim, theksuan që arti, kultura dhe një sistemi funksional politik dhe ekonomik gjithashtu luajn rol në parandalimin e rritjes së radikalizmit dhe ekstremizmit të dhunshëm në shoqëri.

- Theksuan nevojën për të konsoliduar kornizën ligjore dhe atë institucionale, në mënyrë që shetet të jenë në gjendje t'i luftojnë në mënyrë efektive kërcënimet ndaj sigurisë, siç janë terrorizmi dhe radikalizmi.

Theksuan se është e rëndësishmë që të ketë aktivitete dhe masa konkrete për ri-integrim dhe ri-socializim të të ashtuquajturve "luftëtarë të huaj", të cilët ishin të përfshirë në konflikte dhe janë kthyer në vendin e origjinës.

Znj. Tanja Fajon- Anëtare e Parlamentit Evropian, Raportuese për liberalizimin e vizave për Kosovën

Z. Denis MacShane -Ekspert i politikave në rajonin e Ballkanit/Ish Ministër për Evropë dhe Ballkan, Mbretëria e Bashkuar

Znj. Arta Dade- Kryetare e Komisionit për Politikë të Jashtme, Parlamenti i Republikës se Shqipërisë

Z. David Geerts - Anëtar i Dhomës së Përfaqësuesve, Parlamenti i Belgjikës

Z. Miro Kovač -Kryetar i Komisionit për Punë të Jashtme, Parlamenti i Kroacisë

Z. Karel Schwarzenberg- Kryetar i Komisionit për Punë të Jashtme, Dhoma e Deputetëve, Republika Çeke

Znj.Keit Pentus-Rosimannus- Zëvendës Kryetare e Komisionit për Punë të Jashtme, Parlamenti i Estonisë

Z. Silvio Parnis, Anëtar i Parlamentit, Malta

Z. Anne Mulder -Anëtari Komisionit për Punë të Jashtme, Holanda

Z. Maureen O'Sullivan - Ireland Zëvendës kryetar i Komisonit për Punë të Jashtme,Tregti dhe Mbrojtje, Dhoma e Parlamentit, Irlanda

Znj. Marietta Tidei- Anëtare e Komisionit për Punë të Jashtme, Dhoma e Deputetëve, Parlamenti i Italisë

Z. Emanuele Scagliusi - Anëtar i Komisionit për Punë të Jashtme, Dhoma e Deputetëve, Parlamenti i Italisë

Z. Rihards Kols-Zëvendës Kryetar i Komisionit për Punë të Jashtme, Parlamenti i Letonisë

Egidijus Vareikis - Nënkryetar i Komisionit për Punë të Jashtme, Parlamenti i Lituanisë

Mrs. Anne Brasseur- Anëtare e Parlamentit, Kryetare e delegacionit të Luksemburgut në Asamblenë Parlamentare të Këshillit të Evropës

Mr Andrija Nikolić - Kryesues i Komisionit për Marrëdhënie Ndërkombëtare dhe Emigrantë, Parlamenti I Malit të Zi

Mr Luigj Shkreli - Anëtar i Komisionit për Marrëdhënie Ndërkombëtare dhe Emigrantë, Parlamenti I Malit të Zi

Mr Hasan Basri KURT-Anëtar i Komisionit për Punë të Jashtme, Kuvendi i Madh Kombëtar i Turqisë

Mr Manuel Tornare- Anëtar i Komisionit për Punë të Jashtme, Zvicra