Lajmet e fundit

Kryetari i Kuvendit të Republikës së Kosovës, Kadri Veseli, takoi sot kryetarin e Këshillit Kombëtar të Sllovenisë, Mitja Bervar, me të cilin diskutoi për raportet e shkëlqyera në mes të të dyja vendeve dhe mundësitë e zgjerimit të tyre.

Kryeparlamentari Veseli dhe z. Bervar diskutuan për zhvillimet në Republikën e Kosovës dhe rajon, me theks të veçantë për bashkëpunimin ekonomik dhe thellimin e marrëdhënieve në këtë fushë.

Z. Veseli e falënderoi z. Bervar për kontributin e vazhdueshëm të Sllovenisë në drejtim të fuqizimit të shtetësisë së Kosovës, zhvillimit ekonomik, si dhe përkrahjen në rrugën e euro-integrimeve.

z. Bervar, nga ana e tij, vuri në pah se mbështetja e Sllovenisë për Republikën e Kosovës nuk do të mungojë as në të ardhmen, duke u fokusuar në zgjerimin e bashkëpunimit ekonomik, si dhe realizimin sa më të suksesshëm të procesit të euro-integrimeve.