Lajmet e fundit

Kryetari i Kuvendit të Republikës së Kosovës, Kadri Veseli, priti sot drejtorin ekzekutiv të Fondit Global për Angazhim të Komunitetit dhe Rimëkëmbjes (GCERF), me seli në Gjenevë, Khalid Koser.

Në takim u bisedua për angazhimet e institucioneve të Kosovës dhe veprimet konkrete që janë ndërmarrë në parandalimin dhe luftimin e ekstremizmit të dhunshëm dhe radikalizmit.

Kryetari Veseli potencoi përkushtimin maksimal të institucioneve të vendit për të ruajtur sigurinë për të gjithë qytetarët e vendit, kundrejt çdo forme të kërcënimit, që mund të manifestohet nëpërmjet agjendave të ndryshme të ekstremizmit të dhunshëm dhe radikalizmit.

Duke e falënderuar z. Koser për mbështetjen financiare të GCERF-së për Kosovën, kreu i Kuvendit vuri në pah edhe njëherë orientimin perëndimor të Kosovës dhe aspiratën e saj për t'u bërë sa më shpejtë pjesë e familjes së madhe evropiane.

Z. Khalid Koser, nga ana e tij, vlerësoi lart angazhimin e Kosovës e të institucioneve të saj për parandalimin e ekstremizmit të dhunshëm dhe premtoi se organizata që ai udhëheq do të ndihmojë Kosovën në këtë drejtim.