Lajmet e fundit

Me rastin e 24 qershorit - Ditës së egjiptianëve, kryetari i Kuvendit të Republikës së Kosovës, Kadri Veseli, takoi sot në ambientet e Kuvendit një grup qytetarësh të komunitetit egjiptian nga Kosova dhe vendet e tjera të rajonit.

Duke u dëshiruar mysafirëve mirëseardhje në mjediset e institucionit më të lartë legjislativ të vendit, kryeparlamentari Veseli u uroi atyre 24 qershorin, duke e konsideruar shënimin institucional të kësaj dite si një tregues të vlerave të shoqërisë së Kosovës.

"Ne i çmojmë dhe besojmë në vlerat e multietnicitetit. Për ne, kulturat e ndryshme dhe identitetet e ndryshme nuk janë kërcënim, por pasuri njerëzore dhe përparësi e jona për zhvillim dhe integrim evropian. Republika e Kosovës funksionon mbi bazën e një kushtetute liberale dhe demokratike e cila njeh dhe garanton në mënyrë të barabartë liritë dhe të drejtat e individit, por edhe të komuniteteve etnike. Secili, në Kosovë, mund të ndjehet i lirë, të shprehë identitetin e tij kulturor dhe të ndihet krenar me përkatësinë e tij", theksoi kryetari Veseli.

Kreu i Kuvendit të Kosovës konfirmoi përkushtimin e institucioneve të Kosovës për të çuar më tej reformat, veçanërisht në fushën e ekonomisë, në funksion të përmirësimit të jetës së të qytetarëve të Kosovës.

Gjatë kësaj vizite, i pranishëm ishte edhe deputeti i Kuvendit të Kosovës nga radhët e këtij komuniteti, Veton Berisha, i cili së bashku me përfaqësues të tjerë të komunitetit egjiptian, i ndanë mirënjohje kryetarit Veseli, për kontributin e tij në integrimin dhe zhvillimin e këtij komuniteti në Kosovë.