Lajmet e fundit

Me rastin e festës së Pashkëve katolikë, kryetari i Kuvendit të Republikës së Kosovës, Kadri Veseli, e ka uruar kryeipeshkvin e Ipeshkvisë së Kosovës, Imzot Dodë Gjergji dhe gjithë besimtarët katolikë në Republikën e Kosovës.

Në telegramin e urimit të kryeparlamentarit Veseli thuhet:

"I nderuari Imzot Dodë Gjergji,

Me rastin e Festës së Pashkëve, me kënaqësi të veçantë, shpreh urimet e mia më të përzemërta për Juve dhe të gjithë besimtarët katolikë në Republikën e Kosovës.

Pashkët simbolizojnë ringjalljen e jetës, përkushtimin, dashurinë dhe sakrificën e njeriut për njeriun dhe Zotin.
Kjo festë na bën të angazhohemi dhe të veprojmë edhe më me përkushtim për realizimin e vlerave tona individuale dhe të përgjithshme për thellimin e mirëkuptimit, bashkëjetesës dhe paqes ndërmjet njerëzve dhe popujve.

Puna dhe veprat tona të çdoditshme le t'i shërbejnë mirëqenies, besimit dhe dashurisë ndaj njëri tjetrit në Kosovë dhe gjithë botën".