Lajmet e fundit

Komisioni për Administratë Publike, Qeverisje Lokale dhe Media i Kuvendit të Kosovës, kryesuar nga Zenun Pajaziti, kryetar i Komisionit, në bashkëpunim me Institutin për Politika Zhvillimore - INDEP, organizoi sot një tryezë diskutimi me temë: "Korniza ligjore që determinon lirinë e shprehjes në Kosovë". Pasi përshëndeti të pranishmit dhe organizatorin, z. Pajaziti theksoi se është me interes të kemi një pasqyrë për median dhe lirinë e shprehjes, duke ditur se liria e shprehjes në Kosovë, në listën e shteteve rajonale , vlerësohet si jo e mirë, ndaj është koha të merren masa për të pasur një kornizë ligjore sa më të mirë, sa i përket, lirisë së shprehjes, si dhe ushtrimit të profesionit nga ana e gazetarëve. Si Komision, theksoi Zenun Pajaziti,do të përballemi me këto sfida , si dhe me nevojat për avancimin e medias edhe në fushën e ligjeve përkatëse.

Duke prezantuar punimin "Liria e shprehjes dhe e ushtrimit të profesionit të gazetarit në Kosovë", hartuar nga Instituti për Politika Zhvillimore - INDEP, Dardan Abazi në fillim përmendi shqetësimin që ka ngjallur Projektligji për përgjimet, i cila para do kohe u shqyrtua në Kuvendin e Kosovës, që ka ngjashmëri edhe me Ligjin për shprehjen e lirë. Vetë trajtimi i lirisë së shprehjes, theksoi ai, është çështje shumë sensitive.

Si në fjalët hyrëse , ashtu edhe në debatin që pasoi, në të cilin morën pjesë edhe Arben Hajredinaj,Sadri Ferati, Shqipe Pantina,Burim Ejupi, Bajrush Morina etj. u tha se sa i përket kuadrit ligjor nga lëmi i lirisë së mediave, Kosova qëndron mirë në Rajon dhe më gjerë, madje ajo ka legjislacion të avancuar edhe në mbrojtjen e burimeve të gazetarit, mirëpo çështje është krijimi i mekanizmave implementues për zbatimin e ligjeve përkatëse. Ndërkaq, është i nevojshëm profesionalizmi dhe vullneti për të plasuar të vërtetën në media, që në disa raste lë shumë për të dëshiruar. Vëmendja e diskutuesve u përqendrua edhe në çështjen e shpifjes, duke ditur se gjykatat përgjithësisht zvarrisin lëndët , si edhe në lëmenjtë tjerë, ndërkaq të apostrofuarit po heqin pasojat, të cilat nuk mund të kompensohen me gjoba në para. Në debat kishte angazhime edhe për zgjidhjen e çështjes së financimit të transmetuesit publik-RTK-ës.

Tryeza u mbajt në kuadër të aktiviteteve të Komisionit parlamentar për Administratë Publike, Qeverisje Lokale dhe Media, me qëllim të identifikimit të sfidave ligjore që karakterizojnë mediat në Kosovë.