Lajmet e fundit

Kryetari i Kuvendit të Republikës së Kosovës, Kadri Veseli, ka zhvilluar sot takim me kryetarin e Asociacionit të Komunave të Kosovës, Naim Ismaili..
Z. Veseli u njoh nga drejtuesi i Asociacionit të Komunave me veprimtarinë e këtij asociacioni, organizimin, të arriturat dhe sfidat.
Në takim u fol për kompetencat e komunave, si dhe për nevojën e shtimit të përkushtimit për ngritjen e efikasitetit, performancës dhe transparencës në shërbim të qytetarëve. U fol gjithashtu edhe për bashkëpunimin e legjislativit të nivelit qendror me atë lokal, si dhe për zgjerimin e bashkëpunimit ndërkombëtar.
Z. Veseli veçoi kontributin e asociacionit të komunave në shërbim të qytetarëve, duke theksuar se komunat janë të parat që ndeshen me nevojat dhe kërkesat për përmirësimin e jetës së qytetarëve.
Bashkëbiseduesit u pajtuan se ka mundësi dhe hapësirë për thellimin e bashkëpunimit në mes të Kuvendit të Republikës së Kosovës dhe Asociacionit të Komunave të Kosovës, në dobi të vendit dhe qytetarëve.