Lajmet e fundit

Me rastin e festës së Vitit të Ri, kryetari i Kuvendit të Republikës së Kosovës, z. Kadri Veseli, i shoqëruar nga bashkëshortja e tij, Violeta Veseli, vizitoi sot SOS Fshatrat e Fëmijëve në Prishtinë. Z. Veseli u prit nga menaxhmenti i këtij institucioni dhe takoi fëmijë të grupmoshave të ndryshme.

Kryetari i Kuvendit u njoftua për së afërmi me kushtet e jetesës dhe ambientin në të cilin rriten e mbikëqyren këta fëmijë.

Drejtoresha e SOS Fshatrave të Fëmijëve, Nezahat Salihu, e çmoi lart interesimin e kryetarit të Kuvendit të Kosovës për banorët e këtij institucioni, të dëshmuar edhe me ketë vizitë, por edhe mbështetje financiare, të ofruar nga Kuvendi.

"Është kënaqësi kur shohim që nuk jemi ne të vetmit që përkujdesemi për këta fëmijë, por kemi edhe figura të jetës politike e institucionale të vendit që shprehin interesimin e tyre", theksoi drejtoresha Salihu.

Kryeparlamentari Veseli shprehu konsideratën e tij të lartë për punën bujare të menaxhmentit dhe të gjithë stafin të këtij institucioni, në mbikëqyrje të fëmijëve, të cilët për arsye të ndryshme humbin kujdesin prindëror. Kreu i Kuvendit të Kosovës theksoi se përkujdesja për këta fëmijë, është përgjegjësi, para së gjithash, e institucioneve të vendit. Z. Veseli bëri të ditur se nënshkrimi i tij i parë në cilësi të kryetarit të Kuvendit ka qenë pikërisht mbështetja financiare për këtë institucion, ndërsa premtoi se në të ardhmen kjo përkrahje do të rritet edhe më tej.

Gjatë kësaj vizite, kryeparlamentari Veseli takoi, në ambientet e tyre grupe fëmijësh, të moshave të ndryshme, të cilëve u uroi festën e Vitit të Ri dhe u shpërndau dhurata.

Nga ky institucion, kryetari Veseli përcolli mesazhe urimi edhe për qytetarët e Kosovës.