Lajmet e fundit

Kryetari i Kuvendit të Republikës së Kosovës, Kadri Veseli, ka takuar sot ambasadorin e Republikës së Sllovenisë në Kosovë, z. Miljan Majhen. Pas urimit për kryetarin e Kuvendit në postin e ri, bashkëbiseduesit diskutuan për raportet e deritashme të shkëlqyera në mes dy vendeve, duke rikonfirmuar se këto marrëdhënie mund të zgjerohen dhe thellohen me interes të përbashkët.

Z. Veseli e falënderoi ambasadorin Majhen për kontributin e deritashëm të Republikës së Sllovenisë, në veçanti për investimet për zhvillim ekonomik, kur dihet se për shumë vite, Republika e Sllovenisë printe me investime në vendin tonë, me kompanitë tashmë të njohura për qytetarët e Republikës së Kosovës.

Kryetari dhe ambasadori diskutuan edhe për zhvillimet aktuale në Kuvend, duke u fokusuar në prioritetet e kësaj legjislature, siç janë marrëdhëniet fqinjësore dhe rajonale, me theks në thellimin e bashkëpunimit dhe bashkëjetesës fqinjësore. Sllovenia, sipas ambasadorit Majhen, mbështet plotësisht normalizimin e marrëdhënieve në rajon.

Përvoja e Sllovenisë dhe mbështetja e saj në proceset integruese kanë rëndësi të madhe për qytetarët e Kosovës, andaj mirëpritet thellimi i bashkëpunimit të mëtejmë që këto procese të përshpejtohen, në veçanti në fushat që kanë të bëjnë me rritjen e mirëqenies ekonomike dhe investimet e përbashkëta për ndërmarrjet e vogla dhe të mesme në prodhimtari, në bujqësi etj.

Bashkëbiseduesit ishin të një mendjeje sa ai përket nevojës së thellimit të bashkëpunimit në fushën e legjislativit Kosovë-Slloveni. Në këtë frymë, u tha se Kosova është vend tërheqës për investime dhe me kushte të mira për to, por duhet që potenciali investues të njihet me situatën, kapacitetet dhe nevojat që ka Kosova.