Lajmet e fundit

Kryetari i Kuvendit të Republikës së Kosovës, dr. Jakup Krasniqi, priti sot një delegacion të Asamblesë Konsultative të Arabisë Saudite, i përfaqësuar nga Komisioni Parlamentar i Miqësisë, Arabi Saudite-Kosovë, kryesuar nga dr. Abdullah Hamoud Al Harbi.

Pasi u falënderua për mikpritjen, dr. Abdullah Hamoud Al Harbi, ia përcolli kryekuvendarit Krasniqi , përshëndetjet e përfaqësuesve të institucioneve më të larta të Arabisë Saudite dhe ndjenjën e respektit të lartë për shtetin e Kosovës. Në vijim, dr. Abdullah Hamoud Al Harbi theksoi interesin e veçantë të institucioneve të Arabisë Saudite për thellimin e marrëdhënieve ndërmjet Arabisë Saudite dhe Kosovës në të gjithë lëmenjtë. Me këtë rast folën edhe disa anëtarë të delegacionit, duke shprehur mirënjohje për pritjen e ngrohtë në Kosovë, si dhe impresionet për të arriturat në Kosovë.

Kryekuvendari Krasniqi në fjalën e tij shprehu falënderimin e tij ndaj Arabisë Saudite për gjithë mbështetjen e çmueshme që i ka dhënë e po i jep Kosovës. Kjo ndihmë, tha z. Krasniqi, ka ndikuar në fuqizimin e marrëdhënieve ndërmjet dy shteteve mike. Në vijim, kreu i legjislativit të vendit përmendi kontributin e rëndësishëm të Arabisë Saudite në lëmin e ndërtimeve në Kosovë.

Kryekuvendari Krasniqi pastaj i bëri një vështrim çështjes së njohjes së Kosovës tashmë nga 106 vende anëtare të OKB-së, duke theksuar se në këtë proces ka pasur dorë edhe Arabia Saudite. Ai njohu delegacionin saudit edhe me anëtarësimin e Kosovës në shumë institucione ndërkombëtare, sidomos nga lëmi i monetar, si dhe me bashkëpunimin e Kosovës edhe me shtetet fqinje.

Bashkëbiseduesit ishin unik në konstatimin se marrëdhëniet ndërmjet Arabisë Saudite edhe Kosovës do të avancohen edhe më.